జగిత్యాల జిల్లా రాయికల్లో 108, 102 అత్యవసర సేవల వాహనాలను జిల్లా మేనేజర్ యశోద ఐలయ్య తనిఖీ చేశారు. రోగులకు నాణ్యమైన అత్యవసర వైద్య సేవలు అందించడమే తమ లక్ష్యమని ఈ సందర్భంగా ఆమె తెలిపారు.
జిల్లా మేనేజర్ యశోద ఐలయ్య వాహనాల్లో అందుబాటులో ఉన్న అత్యవసర వైద్య పరికరాల పనితీరును, మందుల నిల్వలను, వాటి గడువు తేదీలను క్షుణ్ణంగా పరిశీలించారు. అత్యవసర సమయాల్లో ప్రజలకు మెరుగైన వైద్య సేవలు అందించేందుకు ప్రతి వాహనం అన్ని విధాలుగా సిద్ధంగా ఉండాలని సిబ్బందికి ఆమె సూచించారు.
ముఖ్యంగా రోగుల నుంచి సమాచారం అందిన వెంటనే ఏమాత్రం ఆలస్యం చేయకుండా సంఘటనా స్థలానికి చేరుకొని, రోగులకు అవసరమైన ప్రథమ చికిత్స అందిస్తూ సురక్షితంగా ఆసుపత్రికి తరలించాలని ఆదేశించారు. ఈ తనిఖీ కార్యక్రమంలో చెలిమెల మల్లేశం, 108 పైలట్ అతిఫ్ అలీ, 102 పైలట్ మారంపల్లి నాగరాజు తదితరులు పాల్గొన్నారు.