ఫరూక్నగర్, 11 November
డిగ్రీ కళాశాలలకు ప్రభుత్వం నుంచి రావాల్సిన ఫీజు రీయింబర్స్మెంట్ (ఆర్టీఎఫ్), స్కాలర్షిప్ల బకాయిలను వెంటనే విడుదల చేయాలని తెలంగాణ ప్రైవేట్ డిగ్రీ కళాశాలల ప్రతినిధులు ప్రభుత్వాన్ని కోరారు. గత మూడేళ్లుగా పేరుకుపోయిన బకాయిల కారణంగా డిగ్రీ కళాశాలలు తీవ్ర ఆర్థిక ఇబ్బందులను ఎదుర్కొంటున్నాయని, కళాశాలల నిర్వహణ భారంగా మారిందని వారు ఆవేదన వ్యక్తం చేశారు. ఈ మేరకు టీపీజేఎం రాష్ట్ర అధ్యక్షుడు, చైర్మన్ గౌరీ సతీష్, చేవెళ్ల ఇన్చార్జి భీమ్ భరత్, తెలంగాణ గ్రాడ్యుయేట్ అసోసియేషన్ వర్కింగ్ ప్రెసిడెంట్ కరుణాకర్ హైదరాబాద్లోని ప్రభుత్వ సలహాదారు, రాజ్యసభ సభ్యుడు వేం నరేందర్ రెడ్డి నివాసంలో ఆయనను కలిసి వినతిపత్రం అందజేశారు. ఈ సందర్భంగా రాష్ట్రంలోని డిగ్రీ కళాశాలలు ఎదుర్కొంటున్న సమస్యలను ఆయనకు వివరించారు. ముఖ్యంగా గత మూడు సంవత్సరాలుగా ప్రభుత్వం నుంచి రావాల్సిన ఆర్టీఎఫ్, విద్యార్థుల స్కాలర్షిప్ల బకాయిలు విడుదల కాకపోవడంతో కళాశాలల ఆర్థిక పరిస్థితి ఆందోళనకరంగా మారిందని తెలిపారు. కళాశాలల నిర్వహణ ఖర్చులు, సిబ్బంది జీతాలు, ఇతర విద్యా సంబంధిత అవసరాలను తీర్చడం యాజమాన్యాలకు భారంగా పరిణమించిందని పేర్కొన్నారు. ఫీజు రీయింబర్స్మెంట్ ఆర్థికంగా వెనుకబడిన విద్యార్థులకు ఉన్నత విద్యను అందుబాటులోకి తీసుకురావడంలో కీలక పాత్ర పోషిస్తుందని, బకాయిల విడుదలలో జాప్యం వల్ల కళాశాలలతో పాటు విద్యార్థులు కూడా ఇబ్బందులు ఎదుర్కొనే పరిస్థితి ఏర్పడుతోందని వివరించారు. విద్యార్థుల విద్యా భవిష్యత్తును, కళాశాలల మనుగడను దృష్టిలో ఉంచుకొని ప్రభుత్వం తక్షణమే స్పందించాలని కోరారు.
గత మూడేళ్లుగా పెండింగ్లో ఉన్న బకాయిలను దశలవారీగానైనా త్వరితగతిన విడుదల చేసేలా సంబంధిత శాఖలతో చర్చించి చర్యలు తీసుకోవాలని విజ్ఞప్తి చేశారు. వారి వినతిపై ప్రభుత్వ సలహాదారు వేం నరేందర్ రెడ్డి సానుకూలంగా స్పందించారు. డిగ్రీ కళాశాలలు ఎదుర్కొంటున్న ఆర్థిక సమస్యలను ముఖ్యమంత్రి రేవంత్ రెడ్డి దృష్టికి తీసుకెళ్లి, సమస్య పరిష్కారానికి తనవంతు కృషి చేస్తానని హామీ ఇచ్చారు. ప్రభుత్వం త్వరితగతిన నిర్ణయం తీసుకొని పెండింగ్ బకాయిలను విడుదల చేస్తే రాష్ట్రంలోని డిగ్రీ కళాశాలలకు ఆర్థిక ఉపశమనం కలగడంతో పాటు విద్యార్థుల విద్యాభ్యాసానికి కూడా మేలు జరుగుతుందని కళాశాలల ప్రతినిధులు ఆశాభావం వ్యక్తం చేశారు.


