కామారెడ్డి జిల్లా కేంద్రంలో నూతన ఆధార్ సేవా కేంద్రాన్ని జిల్లా కలెక్టర్ ఆశిష్ సంగ్వాన్ గురువారం ప్రారంభించారు. హైదరాబాద్లోని ప్రాంతీయ కార్యాలయానికి అనుబంధంగా పనిచేసే ఈ కేంద్రం, ఆధార్ నమోదు, వివరాల సవరణ వంటి సేవలను ప్రజలకు సులభతరం చేస్తుంది.
తెలంగాణ రాష్ట్రంలో 14 జిల్లాల్లో ఆధార్ సేవా కేంద్రాలను ఏర్పాటు చేస్తున్నామని, అందులో భాగంగా కామారెడ్డిలో ఈ కేంద్రాన్ని ప్రారంభించడం సంతోషకరమని కలెక్టర్ ఆశిష్ సంగ్వాన్ తెలిపారు. రాష్ట్రంలో ఈ తరహా కేంద్రాలను ఏర్పాటు చేస్తున్న 14 జిల్లాల్లో కామారెడ్డి 12వ జిల్లా అని ఆయన పేర్కొన్నారు.
సాధారణ ఆధార్ కేంద్రాలతో పోలిస్తే ఈ కేంద్రంలో మరిన్ని ప్రత్యేక సేవలు అందుబాటులో ఉంటాయని కలెక్టర్ వెల్లడించారు. గతంలో ఆధార్ సంబంధిత కొన్ని ప్రత్యేక సేవలు పొందడానికి హైదరాబాద్కు వెళ్లాల్సి వచ్చేదని, ఇప్పుడు జిల్లా కేంద్రంలోనే ఈ సేవలు అందుబాటులోకి రావడంతో ప్రజలకు సమయం, ప్రయాణ ఖర్చులు ఆదా అవుతాయని తెలిపారు. ప్రజలు ఈ సదుపాయాన్ని సద్వినియోగం చేసుకోవాలని సూచించారు.
ప్రజలకు నిరంతరాయంగా ఆధార్ సేవలు అందించేందుకు భారత విశిష్ట గుర్తింపు ప్రాధికార సంస్థ () తరఫున ప్రత్యేక అధికారి కూడా ఈ కేంద్రంలో అందుబాటులో ఉంటారని కలెక్టర్ పేర్కొన్నారు. ఆధార్ సంబంధిత సమస్యల పరిష్కారంలో ఈ కేంద్రం ప్రజలకు ఎంతో ఉపయోగకరంగా ఉంటుందని ఆయన తెలిపారు.
ఈ మండల స్పెషల్ ఆఫీసర్ శ్రీధర్ రెడ్డి, ఎంపీడీవో హెబ్సీబా రాణి, ఈడియం ప్రవీణ్ తదితరులు పాల్గొన్నారు. గతంలో ఆధార్ సంబంధిత సేవలు పొందడానికి ప్రజలు ఇబ్బందులు పడేవారు. ఇప్పుడు జిల్లా కేంద్రంలోనే ఈ సేవలు అందుబాటులోకి రావడం వలన ప్రజలకు ఎంతో సౌకర్యవంతంగా ఉంటుందని అధికారులు తెలిపారు.
