YSR Kadapa/Atlur (ధర్మ రథం) జూలై 12
పబ్లిసిటీ స్టంట్లు, లైకులు, కామెంట్ల కోసం మానవత్వాన్ని మంటగలుపుతున్నారని, నేటి డిజిటల్ యుగంలో అంతా కృత్రిమత్వమే కనిపిస్తోందని మేధావులు ఆందోళన వ్యక్తం చేస్తున్నారు. ఒకప్పుడు 'కుడి చేతితో చేసింది ఎడమ చేతికి తెలియకూడదు' అనే సాంప్రదాయం ఉండగా, ఇప్పుడు పేదవారికి సాయం చేయడం కంటే, ఆ క్షణాన్ని కెమెరాలో బంధించి లైకులు సంపాదించుకోవడమే లక్ష్యంగా మారుతోందని విమర్శలు వస్తున్నాయి.
పబ్లిసిటీ స్టంట్లు, లైకులు, కామెంట్ల కోసం మానవత్వాన్ని మంటగలుపుతున్నారని, నేటి డిజిటల్ యుగంలో అంతా కృత్రిమత్వమే కనిపిస్తోందని మేధావులు ఆందోళన వ్యక్తం చేస్తున్నారు. ఒకప్పుడు 'కుడి చేతితో చేసింది ఎడమ చేతికి తెలియకూడదు' అనే సాంప్రదాయం ఉండగా, ఇప్పుడు పేదవారికి సాయం చేయడం కంటే, ఆ క్షణాన్ని కెమెరాలో బంధించి లైకులు సంపాదించుకోవడమే లక్ష్యంగా మారుతోందని విమర్శలు వస్తున్నాయి.
ప్రచారం కోసం యువత ప్రాణాలను సైతం లెక్కచేయడం లేదు. రైలు పట్టాలపై, ఎత్తైన భవనాలపై ప్రమాదకరమైన విన్యాసాలు చేస్తూ ఫోటోలు, రీల్స్ తీసుకుంటూ ఎంతోమంది ప్రాణాలు కోల్పోతున్నారు. ఉత్తరప్రదేశ్లో ఒక యువకుడు రైలు వస్తున్నప్పుడు పట్టాలపై నిలబడి రీల్ తీస్తూ మరణించాడు. మహారాష్ట్రలో కారును రివర్స్ తీస్తూ రీల్ తీయాలనుకున్న యువతి బ్రేక్కు బదులు యాక్సిలరేటర్ తొక్కడంతో లోయలో దూసుకెళ్లి మరణించింది.
ప్రముఖ నటి పూనమ్ పాండే తాను సర్వైకల్ క్యాన్సర్తో మరణించినట్లు నకిలీ ప్రకటన విడుదల చేసి, ప్రచారం కోసమే అలా చేశానని చెప్పడం ఆమె పబ్లిసిటీ పిచ్చికి పరాకాష్ట. రాజస్థాన్లో ఒక రాజకీయ నాయకుడు ఆసుపత్రిలోని రోగులకు పది రూపాయల ఐస్ క్రీమ్ ప్యాకెట్లు పంచుతూ ఫోటోలు దిగి, ఆ తర్వాత వాటిని రోగుల దగ్గర నుంచి వెనక్కి తీసుకున్న ఘటన కూడా వెలుగుచూసింది.
ఒక అధికారి నిరంతరం కెమెరా ఫోకస్లో ఉండాలని కోరుకున్నప్పుడు, సహజత్వం మాయమై కృత్రిమత్వం ప్రవేశిస్తుంది. నిజాయితీగా పనిచేసే అధికారుల కంటే, సోషల్ మీడియాలో హడావుడి చేసే వారికే గుర్తింపు లభిస్తుండటంతో వ్యవస్థలో సమతుల్యత దెబ్బతింటోంది. ఇది తోటి ఉద్యోగుల్లో అసూయను, ప్రజల్లో తప్పుడు సంకేతాలను పంపుతోంది. అధికారులు 'ప్రజా సేవకులం' అనే విషయాన్ని మరిచి, 'సెలబ్రిటీలం' అనే భ్రమలో బతుకుతున్నారు.
ప్రభుత్వాలు కూడా ఈ ధోరణిని కట్టడి చేయాల్సిన అవసరం ఉంది. విధి నిర్వహణలో గోప్యత, హుందాతనం సివిల్ సర్వీస్ నిబంధనల్లో ప్రాథమిక సూత్రాలు. ప్రచారం కోసం ప్రాకులాడుతూ సమయాన్ని వృథా చేసే అధికారులపై కఠిన చర్యలు తీసుకోవాలి. అధికారి పనితీరు ప్రజల జీవితాల్లో మార్పు తీసుకురావాలి కానీ, స్మార్ట్ఫోన్ స్క్రీన్ మీద లైక్స్ తీసుకురావడం కాదు. గుర్తింపు కోరుకోని వాడే నిజమైన అధికారి.
నిజమైన ప్రజాసేవ సోషల్ మీడియా క్లిక్లలో లేదు, ప్రజల కళ్లలోని ఆనందంలో ఉంటుంది. 'రీల్' నుంచి బయటకు వచ్చి 'రియల్' సమస్యల పరిష్కారంపై దృష్టి పెట్టినప్పుడే ఆ పదవులకు గౌరవం, వ్యవస్థకు బలం చేకూరుతాయి.
