మధిర, 24 September
ఖమ్మం జిల్లాలో ఆహార భద్రతా ప్రమాణాల అమలుపై అధికారులు కఠిన చర్యలు చేపట్టారు. నిబంధనలు పాటించని 11 ఆహార వ్యాపార సంస్థలపై మొత్తం రూ. 2.90 లక్షల జరిమానా విధించారు. నాణ్యత లేని ఆహారం విక్రయిస్తే కఠిన చర్యలు తప్పవని అదనపు కలెక్టర్ మరియు ఫుడ్ సేఫ్టీ ఆఫీసర్ హెచ్చరించారు.
ఖమ్మం జిల్లాలో ఆహార భద్రతా నిబంధనల ఉల్లంఘనపై అధికారులు కొరడా ఝుళిపించారు. ఆహార భద్రతా ప్రమాణాల అమలుపై దృష్టి సారించిన అధికారులు, నిబంధనలు పాటించని వివిధ ఆహార వ్యాపార సంస్థలపై నిర్వహించిన తనిఖీల్లో భాగంగా నమోదైన 11 కేసులను అదనపు కలెక్టర్ (రెవెన్యూ) సమక్షంలో పరిష్కరించారు. ఈ సందర్భంగా, ఫుడ్ సేఫ్టీ ఆఫీసర్ సి.హెచ్.లోకేష్ ఆధ్వర్యంలో ఈ చర్యలు తీసుకుని, మొత్తం రూ. 2,90,000 జరిమానా విధించారు. నిబంధనలు ఉల్లంఘించిన వాటిలో రమేష్ ధాబాకు రూ. 1,00,000, హవేలీకి రూ. 75,000, రిలయన్స్ రిటైల్కు రూ. 50,000, డిలైట్ మండీకి రూ. 20,000, జాజూ సంస్థకు రూ. 20,000 చొప్పున జరిమానా ఖరారు చేశారు. మిగిలిన కేసుల్లో ఇతర సంస్థలపై తదనుగుణంగా జరిమానా విధించినట్లు అధికారులు వెల్లడించారు.
ఆహార వ్యాపార సంస్థలన్నీ తూచా తప్పకుండా పరిశుభ్రత, నాణ్యతా ప్రమాణాలు పాటించాలని స్పష్టం చేశారు. ఎఫ్ఎస్ఎస్ఏఐ నిబంధనలను బేఖాతరు చేసే వారిపై ఎటువంటి ఉపేక్ష లేకుండా చట్టపరమైన కఠిన చర్యలు ఉంటాయని హెచ్చరించారు. ప్రజల ఆరోగ్యంతో చెలగాటమాడే వారిని సహించేది లేదని స్పష్టం చేశారు. సామాన్య ప్రజలకు సురక్షితమైన, నాణ్యమైన ఆహారం అందుబాటులో జిల్లా వ్యాప్తంగా తనిఖీలు, నమూనాల సేకరణ ప్రక్రియ నిరంతరం కొనసాగుతుందని ఫుడ్ సేఫ్టీ ఆఫీసర్ సి.హెచ్.లోకేష్ తెలిపారు. వ్యాపార సంస్థలన్నీ నిబంధనల ప్రకారమే నడుచుకోవాలని ఆయన సూచించారు.
