గుంటూరు, 13 September
తల్లిని హత్య చేసిన కూతురు, ఆమె మూడో భర్త పోలీసులకు చిక్కకుండా పరారీ అయ్యారు. ఆస్తి కోసమే ఈ దారుణానికి ఒడిగట్టినట్లు తెలుస్తోంది. ఈ ఘటనలో మృతురాలి మనవడే కీలక ప్రత్యక్ష సాక్షిగా మారాడు.
దేవుడా.. ఇలాంటి కూతురు ఎవ్వరికీ పుట్టొద్దు.. అప్పటికే రెండు పెళ్లిల్లు ...మూడో భర్తతో కలిసి నవ మాసాలు మోసిన తల్లినే లెపేసింది జిల్లా పొన్నూరులో దారుణ ఘటన వెలుగుచూసింది. కంటికి రెప్పలా చూసుకోవాల్సిన కన్నబిడ్డే కాలయమురాలైంది. తల్లి ఒంటిపై ఉన్న బంగారం, ఇంట్లోని నగదుపై కన్నేసిన ఓ కూతురు.. తన మూడో భర్తతో కలిసి అత్యంత పాశవికంగా తల్లిని హత్య చేసింది. ఈ కిరాతకానికి స్వయానా ఆమె కుమారుడే ప్రత్యక్ష సాక్షిగా మారడం స్థానికంగా తీవ్ర కలకలం రేపింది. పొన్నూరు పట్టణంలోని క్యాబిన్ పేటకు చెందిన లక్ష్మీ అనే మహిళ స్థానిక ప్రైవేట్ ఆసుపత్రిలో ఆయాగా పనిచేస్తూ జీవనం సాగిస్తోంది. ఆమెతో పాటు ఆమె కూతురు పుష్పలత మొదటి భర్త కుమారుడు కూడా కలిసి ఉంటున్నాడు. కాగా పుష్పలత తన మూడో భర్త రాజాను వెంటబెట్టుకుని రెండు నెలల కిందటే తల్లి లక్ష్మీ వద్దకు వచ్చింది. అప్పటి నుంచి తల్లితో ఎంతో సఖ్యతగా ఉంటున్నట్లు నటిస్తూ వచ్చింది. లక్ష్మీ వద్ద ఉన్న డబ్బు, బంగారు ఆభరణాలపై పుష్పలత, రాజా కన్నుపడింది. వాటిని తమకు ఇచ్చేయాలంటూ గత కొన్ని రోజులుగా లక్ష్మిని తీవ్రంగా వేధించడం మొదలుపెట్టారు ఆమె నిరాకరించడంతో ఎలాగైనా అడ్డు తొలగించుకోవాలని పక్కా ప్లాన్ వేశారు. శుక్రవారం అర్ధరాత్రి గాఢ నిద్రలో ఉన్న లక్ష్మీ మెడకు చీర బిగించి అతి కిరాతకంగా ఊపిరాడకుండా చేసి చంపేశారు. ఈ దారుణం జరుగుతున్న సమయంలో లక్ష్మీ మనవడు నిద్రలేచి కేకలు వేయబోయాడు. వెంటనే అతడిని బెదిరిస్తూనే.. నీకు కొత్త సైకిల్ కొనిస్తాం, ఎవరికీ చెప్పకు అంటూ మభ్యపెట్టారు. అనంతరం లక్ష్మి మెడలోని బంగారు గొలుసు, ఇంట్లో దాచిన నగదును మూటగట్టుకుని రాత్రికి రాత్రే అక్కడి నుంచి ఉడాయించారు. పక్కనే భయంతో వణుకుతూ ఏడుస్తున్న మనవడిని ఆరా తీయగా.. “అమ్మ, నాన్నే అమ్మమ్మను చంపేశారు” అంటూ రాత్రి జరిగిన ఘోరాన్ని కన్నీళ్లతో వివరించాడు. దీంతో స్థానికులు వెంటనే పోలీసులకు సమాచారం అందించారు. సమాచారం అందుకున్న పొన్నూరు పోలీసులు ఘటనా స్థలానికి చేరుకుని వివరాలు సేకరించారు. మృతదేహాన్ని పోస్టుమార్టం నిమిత్తం స్థానిక ప్రభుత్వ ఆసుపత్రికి తరలించారు. ఈ హత్య కేసులో మృతురాలి మనవడే కీలక ప్రత్యక్ష సాక్షి అని సీఐ కిషోర్ కుమార్ తెలిపారు. పరారీలో ఉన్న పుష్పలత, ఆమె మూడో భర్త రాజా కోసం ప్రత్యేక బృందాలతో గాలింపు చర్యలు ముమ్మరం చేశామని, త్వరలోనే నిందితులను పట్టుకుని కఠినంగా శిక్షిస్తామని ఆయన స్పష్టం చేశారు.
