గ్రామ పంచాయతీల్లో అభివృద్ధి పనుల నిధులు, బిల్లుల చెల్లింపుల్లో జాప్యం లేకుండా చూడాలని రాష్ట్ర ప్రభుత్వం కీలక ఆదేశాలు జారీ చేసింది. ఉప సర్పంచ్లు తగిన కారణం లేకుండా 7 రోజులకు మించి చెక్కులపై సంతకం చేయకుండా కాలయాపన చేస్తే చట్టపరమైన చర్యలు తప్పవని హెచ్చరించింది.
గ్రామ పంచాయతీల్లో చెక్కుల చెల్లింపులకు అడ్డంకులు లేకుండా ప్రక్రియ వేగవంతంగా సాగేలా చూడాలని పంచాయతీ రాజ్, గ్రామీణాభివృద్ధి శాఖ మంత్రి సీతక్క ఆదేశించారు. ఈ మేరకు జిల్లా పంచాయతీ అధికారులకు స్పష్టమైన ఉత్తర్వులు జారీ అయ్యాయి.
సర్పంచ్, ఉప సర్పంచ్ విభేదాలు
గ్రామాల్లో సర్పంచ్, ఉప సర్పంచ్ల మధ్య ఉన్న విభేదాల కారణంగా బిల్లుల చెల్లింపులు నిలిచిపోయి, అభివృద్ధి పనులకు ఆటంకం కలగకుండా చూడటమే లక్ష్యంగా ప్రభుత్వం ఈ మార్గదర్శకాలను విడుదల చేసింది. ఈ ఆదేశాలు అమలులోకి రావడంతో గ్రామాల్లో పనులు వేగవంతం అవుతాయని భావిస్తున్నారు.
చట్టపరమైన చర్యలు
తగిన కారణం లేకుండా 7 రోజులకు మించి చెక్కులపై సంతకం చేయకుండా ఉప సర్పంచ్లు కాలయాపన చేస్తే, సంబంధిత జిల్లా కలెక్టర్ వెంటనే విచారణ చేపట్టాల్సి ఉంటుంది. ఆ విచారణలో ఉప సర్పంచ్ ఉద్దేశపూర్వకంగానే చెక్కులను నిలిపివేసినట్లు తేలితే, వారిపై చట్టప్రకారం తగిన చర్యలు తీసుకుంటారు.
